Azərbaycan News Agency

Avropa İttifaqı (Aİ) Şurasının Prezidenti Antonio Kosta Belqradda Serbiya Prezidenti Aleksandar Vuçiç, Parlamentin sədri Ana Brnabiç və vətəndaş cəmiyyəti təşkilatlarının nümayəndələri ilə görüşərək ölkənin Aİ-yə üzvlük prosesi ilə bağlı müzakirələr aparıb.

Serbiya ilə tərəfdaşlığın əsaslarına və Aİ-nin dəstəyinə toxunan Kosta deyib: “Belqrada yenidən qayıtmaqdan məmnunam. Aleksandar Vuçiç, Ana Brnabiç və vətəndaş cəmiyyəti nümayəndələri ilə görüşlərimdə vurğuladım ki, Aİ ticarət, investisiya və demokratik institutların gücləndirilməsi sahələrində Serbiyanın ən mühüm tərəfdaşı olaraq qalır.”

Üzvlük prosesində irəliləyişin birbaşa Serbiyanın öz qətiyyətindən asılı olduğunu bildirən Kosta qeyd edib: “Biz daha çox iş görməyə hazırıq. Lakin irəliləyişin sürəti Serbiyanın öz iradəsindən asılıdır. Hüququn aliliyi, seçki islahatları və media azadlığı kimi sahələrdə islahatları sürətləndirməyə davam etmək vacibdir.”

Avropa inteqrasiyasının ictimai konsensus tələb etdiyini vurğulayan Kosta sözlərini belə yekunlaşdırıb: “Üzvlük prosesi yalnız hökumətin vəzifəsi deyil. Bu, bütün Serbiya cəmiyyətinin səfərbər olunmasını tələb edir. Vaxt çox önəmlidir. Aİ-nin qapısı açıq qalır, lakin qətiyyətli addımlar atmaq üçün imkan məhz indi mövcuddur.”