Azərbaycan News Agency

Ukrayna Prezidenti Zelenski Rusiyanın Odesa şəhərinə qarşı genişmiqyaslı PUA hücumu həyata keçirdiyini açıqlayıb. O bildirib ki, hücumda 50-dən çox PUA istifadə olunub, enerji infrastrukturu və mülki obyektlər əsas hədəflər sırasında yer alıb.

Zelenski hücum nəticəsində beş yaşayış binasının zədələndiyini, mənzillərdə və pilləkən boşluqlarında ciddi dağıntıların baş verdiyini qeyd edib. İlkin məlumata görə, aralarında uşaqların da olduğu onlarla insan yaralanıb. O əlavə edib ki, bütün fövqəladə xidmətlər ərazidə işləyir və dağıntılar altında qala biləcək şəxslərə çatana qədər axtarış-xilasetmə işləri davam edəcək. Həmçinin rus PUA-larından birinin evangelist xristianlara məxsus ibadətgahı vurduğu bildirilib.

Zelenski gecə ərzində Lvov, Dnipro, Nikolayev, Odesa, Sumı və Xarkov bölgələrinin də hücumlara məruz qaldığını, Rusiyanın enerji obyektlərini və kritik infrastrukturu hədəf aldığını deyib. Bu hücumlarda da yaralananların olduğu bildirilib. O, Ukraynaya qarşı ümumilikdə 165 hücum PUA-sının buraxıldığını, onların təxminən 100-nün “Şahed” tipli olduğunu vurğulayıb.

Rusiyanın hər bir hücumunun diplomatik səyləri zəiflətdiyini qeyd edən Zelenski ABŞ-ni, Avropanı və digər tərəfdaşları susmamağa çağırıb. O bildirib ki, real sülh yalnız Moskva üzərində təzyiqin artırılması ilə mümkündür və sanksiyaların genişləndirilməsinin, eləcə də Rusiyanın tanker donanmasına qarşı addımların əhəmiyyətinə diqqət çəkib.